敷面膜7大注意!

大部分女性對面膜應該都唔會陌生，無論係日常護理抑或急救皮膚，面膜都係最佳幫手。但原來唔少皮膚問題都係由面膜引起，皆因用錯方法，或者無注意到一些小細節。首先，敷面膜有幾個疑問必須要搞清楚，然後就要了解各類面膜使用時要注意的事。

1. 面膜係咪唔可以日日敷？
呢個問題爭議性最大，有人話得，有人話唔得，其實最終係要睇返自己膚質。有啲人的皮膚勁乾或者吸收力好，日日敷都無問題；有啲皮膚就會因為營養過剩而出粒粒。

2. 面膜係咪唔可以敷太耐？
一般敷面時間為15-20分鐘，水分含量高的面膜可以敷多一陣，但最長亦不可超過30分鐘。尤其是paper mask，面膜乾了會反過來吸收肌膚嘅水分，就算面膜仍然好濕潤，都唔好因為怕浪費而繼續敷，因為面膜嘅原理是隔絕空氣，將營養導入皮膚，敷太耐就會令皮膚缺氧。如果實在唔捨得面膜剩低的精華液，可以用來搽喺頸或身體其他部位。

想搵岩自己用既paper mask? ►點我

3. 敷完面膜究竟要不要洗臉？

基本上，敷面後即使不洗也沒大礙（明白大家都想懶一點），但喺敷面嘅20分鍾內，皮膚已經處於飽和狀態，再多嘅營養及精華液留喺皮膚上都係白費。而且過多嘅精華液會令皮膚感覺黏膩，亦會阻礙之後塗搽其他護膚品時嘅吸收，所以有啲人會喺敷面後用清水洗一洗面。更簡單嘅方法係，喺敷完面膜後用濕毛巾或者紙巾稍微按壓一下臉部，將多餘嘅精華液印走後，再用後續護膚品會更好。

4. 可唔可以沖涼同時敷面？
唔好以為沖涼時水蒸氣充足，毛孔完全打開，就係敷面嘅最佳時機。其實除咗paper mask可以喺沖涼時使用外，其他例如gel mask或撕拉式面膜都唔應該喺沖涼時使用，因為水蒸氣會導致面膜難以與肌膚密合，影響面膜效果。

5. 注意免沖洗睡眠面膜只係喺一定嘅時段唔需要沖洗，而不係完全唔需要清洗。瞓覺之前敷嘅面膜最好喺6-8小時內洗乾淨，以免阻礙肌膚嘅正常呼吸及代謝。而敏感或者油性肌膚，最好唔好使用睡眠面膜，過夜嘅面膜可能會令皮膚容易長痘。

6. 水洗型嘅gel mask或cream mask，一定要塗上厚厚一層先會有效，以睇唔到原本膚色為標準。由於gel mask係啫喱狀，塗抹時會有清涼感，所以唔建議秋冬季使用，因為秋冬時肌膚需要有點溫度來促進肌膚吸收營養。

7. 泥狀嘅撕拉式面膜一般都係去黑頭用，敷面膜前做好用熱水蒸一下臉部，或者用熱毛巾敷一下鼻頭再塗抹，咁樣可以打開毛孔，令毛孔深層嘅油脂污垢更易去除。注意塗抹時不可太薄或太厚；敷面膜時最好不要皺眉、大笑，並儘量避免說話。

Source: https://cg.cosmopolitan.com.hk/beauty/beauty-features/155a0ea80802675/%E6%95%B7%E9%9D%A2%E8%86%9C7%E5%A4%A7%E6%B3%A8%E6%84%8F%E4%BA%8B%E9%A0%85-